സിനിമാലോകത്തെ താരങ്ങളോടുള്ള ആരാധകരുടെ സ്നേഹം പലപ്പോഴും അതിരുകൾ കടക്കാറുണ്ട്. അത് പലപ്പോഴും അവിശ്വസനീയമായ പ്രകടനങ്ങളിലേക്ക് അവരെ നയിക്കാറുമുണ്ട്. തെലുങ്ക് സൂപ്പർതാരം ജൂനിയർ എൻടിആറിന്റെ ആരാധകരും ഇപ്പോൾ ഇപ്രകാരം ആകാശത്തൊരു വിസ്മയം തീർത്തുകൊണ്ട് ലോകശ്രദ്ധ നേടുകയാണ്.
ഓസ്‌ട്രേലിയയിലെ മെൽബണിലെ നീലാകാശത്ത് 'NTR War 2' എന്ന് ഫ്ളൈറ്റ് സ്മോക്ക് ഉപയോഗിച്ച് അതിഗംഭീരമായി എഴുതിച്ചുകൊണ്ട് അവർ നടത്തിയ പ്രകടനം നിമിഷനേരം കൊണ്ട് വൈറലായി മാറി. ഈ ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചതോടെ, 'NTR War 2' എന്ന ഹാഷ്‌ടാഗ് ലോകമെമ്പാടുമുള്ള സിനിമാപ്രേമികൾക്കിടയിൽ ട്രെൻഡിംഗാവുകയും ചെയ്തു.
ജൂലൈ 25-ന് റിലീസ് ചെയ്യുന്ന 'വാർ 2' ചിത്രത്തിന്റെ ട്രെയിലറിന് മുന്നോടിയായാണ് ഈ ആകാശമെഴുത്ത് വിസ്മയം അരങ്ങേറിയത്. ഈ ചിത്രം ബോളിവുഡിലേക്കുള്ള ജൂനിയർ എൻടിആറിന്റെ ഏറെ കാത്തിരിക്കുന്ന അരങ്ങേറ്റം കൂടിയാണ്. ഹിന്ദി സിനിമയിൽ തന്റെ സാന്നിധ്യം ഉറപ്പിക്കാൻ ഒരുങ്ങുന്ന എൻടിആർ, ഹൃത്വിക് റോഷനൊപ്പം ഒരു പ്രധാന വില്ലൻ കഥാപാത്രത്തെയാണ് ഈ സിനിമയിൽ അവതരിപ്പിക്കുന്നത്. ഇത് ആരാധകർക്കിടയിൽ വലിയ ചർച്ചകൾക്ക് വഴിവെച്ചിട്ടുണ്ട്. കിയാര അദ്വാനിയാണ് ചിത്രത്തിലെ നായിക. ബോളിവുഡിലെ ശ്രദ്ധേയനായ സംവിധായകൻ അയാൻ മുഖർജിയാണ് ഈ ബിഗ് ബജറ്റ് ചിത്രത്തിന്റെ അമരത്ത്.
War 2 Celebration Melbourne NTR Fans https://t.co/YZJ1mwfUwQ
ജൂനിയർ എൻടിആറും ഹൃത്വിക് റോഷനും സിനിമാ ജീവിതത്തിൽ 25 വർഷം പൂർത്തിയാക്കുന്ന വേളയില്‍ കൂടിയാണ്
വാര്‍ 2 ട്രെയിലര്‍ പുറത്തുവരുന്നത്. ഹിന്ദി, തെലുങ്ക്, തമിഴ് ഭാഷകളിൽ ഒരുങ്ങുന്ന 'വാർ 2' 2025 ഓഗസ്റ്റ് 14-ന് ലോകമെമ്പാടുമുള്ള തിയേറ്ററുകളിൽ റിലീസ് ചെയ്യും. ഈ ചിത്രത്തിനായി ആരാധകർ വലിയ പ്രതീക്ഷകളോടെയാണ് കാത്തിരിക്കുന്നത്.
Content Highlights : Jr. NTR fans skywrote NTR War 2 in Melbourne, sparking global buzz for trailer launch